Вазорати тандурустӣ ва ҳифзи иҷтимоии аҳолии Ҷумҳурии Тоҷикистон гузаронидани иммунизатсияро бар зидди 10 намуди бемориҳои сироятӣ барои кудакон тавсия медиҳад, аз ҷумла бар зиддӣ сурхча, гулафшон, гепатити В, гулўзиндонак, кузоз (столбняк), кабудсулфа, сирояти гемофилии типи В, фалаҷ (полиомиелит), сирояти ротавирус ва сил; Кўдак барои иммунизатсия бояд шаш маротиба ба муассисаҳои тиббии ҷойи зисташон оварда шавад; Ҳар вояи (дозаи) ваксина муҳим аст, зеро ҳамаи онҳо кўдакро аз бемориҳое, ки барои навзодон ва кўдакон хатарноканд, муҳофизат мекунанд.

Ваксинаҳо ҳимояи беҳтарин бар муқобили бемориҳои зиёде мебошанд, ки бештар ба оризаҳои ҷиддӣ ба монанди илтиҳоби шуш, менингит (илтиҳоби пардаҳои майна), сиррози ҷигар, сирояти хун, маъюбӣ ва ҳатто ба марг оварда мерасонад.

Баъзе ваксинаҳо бояд, ки бештар аз як воя дода шаванд, зеро як вояи он барои ҳимояи пурра ва давомнок бар муқобили бемориҳо кофӣ нест; Якчанд воя имконият медиҳанд, то кўдаконе, ки аз вояи якум ҳимоят нашудаанд, ҳифз шаванд.

Таркиби ваксинаҳо аз ҷузъҳое иборатанд, ки барои дар бадан пайдо кардани масуният бар муқобили бемориҳо мусоидат менамоянд; Дар таркиби ваксинаҳо ҳамчунин дигар маводҳое низ ҳастанд, ки барои истеҳсол, таъминоти бехатарӣ ва сифати ваксина заруранд.

Тақвими миллии иммунизатсия барои ҳимояи кўдакон пеш аз эҳтимоли “вохўрӣ”- и онҳо бо бемориҳои иқтидоран хатарнок, хусусан дар даврае, ки ба сирояти онҳо бештар осебпазиранд, тартиб дода шуда аст...

Ваксинаҳо ба кўдакон аз навзодӣ дода мешаванд, зеро он дар ин синну сол нисбати баъзе аз бемориҳои сирояткунанда бештар осебпазир ҳастанд.